छत्रपती संभाजी महाराज

छत्रपती संभाजी महाराजांचे जीवन, त्यांचे नेतृत्व आणि मुघल साम्राज्याविरुद्ध त्यांनी दिलेला लढा हा मराठ्यांच्या इतिहासातील महत्त्वाचा अध्याय आहे. डॉ. इस्माईल पठाण यांनी लिहिलेल्या या चरित्रात संभाजी महाराजांच्या संघर्षाचा ऐतिहासिक संदर्भातून विचार केला आहे.

या पुस्तकाचे महत्त्वाचे वैशिष्ट्य म्हणजे मराठे आणि मुघल यांच्यातील संघर्षाकडे केवळ हिंदू-मुस्लीम असा धार्मिक संघर्ष म्हणून न पाहता, साम्राज्यवादी विस्ताराला दिलेला प्रतिकार म्हणून पाहण्याचा दृष्टिकोन. औरंगजेबाच्या साम्राज्यविस्ताराला विरोध करताना मराठ्यांनी स्वराज्याच्या स्वातंत्र्यासाठी दिलेल्या लढ्याचे ऐतिहासिक महत्त्व या ग्रंथातून अधोरेखित होते.