माय लॉर्ड – जागतिक कायद्याचा चित्तथरारक प्रवास

न्यायदेवतेच्या डोळ्यांवरील पट्टी, हातातील तराजू आणि तलवार ही केवळ प्रतीके नसून न्यायव्यवस्थेच्या मूलभूत तत्त्वांचे दर्शन घडवतात. तराजू दोन्ही बाजूंचा समतोल दर्शवतो, तर डोळ्यांवरील पट्टी निष्पक्ष न्यायाचे प्रतीक आहे. ‘माय लॉर्ड – जागतिक कायद्याचा चित्तथरारक प्रवास’ या पुस्तकातून अच्युत गोडबोले आणि अ‍ॅड. माधुरी काजवे यांनी कायद्याच्या जगाची रंजक सफर घडवली आहे. कायद्याची तत्त्वे, न्यायाची संकल्पना आणि न्यायव्यवस्थेच्या विकासामागील विचार समजून घेण्यासाठी हे पुस्तक मार्गदर्शक ठरते. कायदा केवळ नियम आणि शिक्षांपुरता मर्यादित नसून तो समाजातील न्याय, समानता आणि अधिकार यांच्याशी जोडलेला आहे, याची जाणीव या पुस्तकातून होते. कायद्याविषयी कुतूहल असणाऱ्या वाचकांसह विद्यार्थी, कायद्याचे अभ्यासक आणि न्यायव्यवस्थेचा इतिहास जाणून घेऊ इच्छिणाऱ्यांसाठी हे पुस्तक माहितीपूर्ण व वाचनीय आहे.