रामाच्या पावलांवर पाऊल

वनवासाच्या काळात प्रभू रामचंद्रांनी ज्या मार्गांवरून प्रवास केला, त्या ठिकाणांचा प्रत्यक्ष शोध घेण्याची कल्पना लेखकद्वयीच्या मनात आली आणि त्यातून ‘रामाच्या पावलांवर पाऊल’ या पुस्तकाचा प्रवास सुरू झाला. अयोध्या, दंडकारण्य, पंचवटी, किष्किंधा, रामेश्वरम आणि श्रीलंका अशा रामायणाशी निगडित विविध ठिकाणांना भेट देत त्यांनी या प्रवासातील अनुभव संकलित केले. या प्रवासादरम्यान स्थानिक रहिवासी, पुजारी आणि महंत यांच्याशी संवाद साधताना त्यांना रामकथेशी संबंधित अनेक आख्यायिका, लोककथा आणि पिढ्यान्‌पिढ्या सांगितल्या जाणाऱ्या कहाण्या ऐकायला मिळाल्या. त्यांपैकी अनेक कथा या पुस्तकात समाविष्ट केल्यामुळे त्याला अभ्यासपूर्णतेबरोबरच रंजकतेची जोड मिळाली आहे. रामायणाच्या विविध आवृत्त्यांमध्ये कथांचे तपशील वेगवेगळे असले, तरी त्यांना जोडणारी नैतिक मूल्यांची चौकट समान असल्याचे लेखकद्वयीच्या लक्षात आले. भारतीय जनमानसात खोलवर रुजलेली रामकथा ही केवळ धार्मिक आख्यायिका नसून लोकजीवन, सांस्कृतिक आणि सामाजिक परंपरा तसेच भक्तिभावाचा अविभाज्य भाग आहे. या परंपरांचा मागोवा घेत प्रत्यक्ष स्थळांचा शोध घेणारे हे पुस्तक वाचकांना रामायणाकडे एका वेगळ्या दृष्टिकोनातून पाहण्याची संधी देते. इतिहास, संस्कृती, लोकपरंपरा आणि प्रवास यांची सांगड घालणारा हा शोधप्रवास रामकथेविषयी कुतूहल असणाऱ्या वाचकांसाठी विशेष महत्त्वाचा ठरतो.