हेचि दान देगा देवा

‘हेचि दान देगा देवा’ ही संत तुकाराम महाराजांच्या जीवनावर आधारित कादंबरी आहे. तुकोबांचा जन्म, बालपण, मित्रपरिवार, बुद्धिमत्ता आणि भगवान विठ्ठलावरील त्यांची अपार भक्ती यांचा लेखिकेने सविस्तर वेध घेतला आहे. पहिल्या विवाहातील अपयश, आवलीशी झालेला दुसरा विवाह आणि कुटुंबातील पाच प्रिय व्यक्तींच्या दुःखद निधनामुळे त्यांच्या आयुष्यात निर्माण झालेली निराशा यांचे हृदयस्पर्शी चित्रण या कादंबरीत आढळते. या दुःखातून सावरताना तुकाराम महाराजांनी विठ्ठलाच्या चरणी स्वतःला समर्पित केले आणि अभंगरचनेला सुरुवात केली. त्यांच्या अभंगांमधील भाषा, विचारांची खोली आणि भक्तिभाव यांमुळे सामान्य जनसमुदाय त्यांच्याकडे आकर्षित झाला; मात्र त्यांच्या विचारांमुळे तत्कालीन उच्चवर्णीय आणि सत्ताधारी वर्गात मत्सर निर्माण झाला. चातुर्वर्ण्य व्यवस्थेला आव्हान दिल्याच्या कारणावरून त्यांचे अभंग नष्ट करण्याचा प्रयत्न झाला, तरीही तुकोबांचे विचार त्यांच्या अनुयायांच्या मनातून पुसले गेले नाहीत. त्यांच्या अनुयायांनी अभंगगाथेचे पुनरुज्जीवन केले आणि पाचशे वर्षांनंतरही तुकाराम महाराजांचे विचार महाराष्ट्राच्या जनमानसात जिवंत आहेत. तुकोबांच्या महानतेबरोबरच तत्कालीन वारसा, संस्कृती, धार्मिक विधी, परंपरा आणि सामाजिक जीवनाची ओळख करून देणारी ही कादंबरी आहे.