के कनेक्शन्स

लहानपण मागे पडत असताना आणि मोठेपण अजून पूर्णपणे स्वीकारलेलं नसताना आयुष्यात येणारा गोंधळ, तगमग, हरवलेपण आणि नव्याने काहीतरी गवसण्याचा आनंद या पुस्तकात अनुभवायला मिळतो. पहिला जिवलग मित्र, शाळेत घडलेली धम्माल, क्रिकेटच्या मैदानावर घालवलेला वेळ, लायब्ररीतील पुस्तकांचा दरवळ, आजी-आजोबांच्या मायेचा स्पर्श, शेजारच्या दादाचं गच्चीवरचं प्रेमप्रकरण आणि पहिला ब्रेकअप अशा आठवणींचे अनेक रंग यात आहेत.
आयुष्यातील काही क्षण आनंददायी असतात, तर काही मनावर काळसर छाया उमटवतात. अशाच उजळ आणि गडद आठवणींच्या तुकड्यांतून हा सफरनामा आकार घेतो. जगाचे अनेक अनुभव येऊनही मनात टिकून राहिलेल्या निरागसतेचे दर्शन या पुस्तकातून घडते. निखिलेश चित्रे आणि हृषीकेश गुप्ते यांनीही पुस्तकातील जिवंत व्यक्तिरेखा आणि घटनांविषयी प्रशंसात्मक प्रतिक्रिया व्यक्त केल्या आहेत.