अण्णाभाऊंची दर्दभरी दास्तान

लोकशाहीर अण्णा भाऊ साठे हे गरीब, दलित, शोषित आणि वंचितांच्या वेदनांना आपल्या साहित्याद्वारे प्रभावीपणे व्यक्त करणारे थोर साहित्यिक आणि लोकशाहीर होते. प्रतिकूल परिस्थितीतून मार्ग काढत त्यांनी आपल्या लेखणीच्या आणि शाहिरीच्या माध्यमातून समाजातील अन्याय, विषमता आणि शोषणाविरुद्ध आवाज उठवला. पिळवणूक झालेल्या स्त्रियांच्या वेदना आणि वंचितांच्या संघर्षाला त्यांनी आपल्या साहित्यातून अभिव्यक्ती दिली. संयुक्त महाराष्ट्राच्या चळवळीत डफावर थाप देत मराठी भाषेचा आणि महाराष्ट्राच्या अस्मितेचा जागर करणाऱ्या अण्णा भाऊंनी आपल्या शाहिरीने जनमानस जागृत केले. त्यांच्या साहित्यिक प्रतिभेचा, सामाजिक बांधिलकीचा आणि क्रांतिकारी विचारांचा प्रभाव अनेक मान्यवरांपर्यंत पोहोचला. संघर्ष, समता, सामाजिक न्याय आणि मराठी संस्कृतीप्रती असलेली निष्ठा यांचे दर्शन घडवणारे हे पुस्तक अण्णा भाऊ साठे यांच्या बहुआयामी व्यक्तिमत्त्वाची ओळख करून देते.