लेडीज कूपे

अखिलनंदेश्वरी ऊर्फ अखिला ही एका पारंपरिक तमिळ ब्राह्मण कुटुंबातील मोठी मुलगी आहे. वडिलांच्या निधनानंतर संपूर्ण कुटुंबाची जबाबदारी तिच्यावर येते. आईची काळजी घेणे, भावंडांचे शिक्षण आणि विवाह यांची व्यवस्था करणे या कर्तव्यांमध्ये तिचे स्वतःचे आयुष्य मागे पडते. वयाच्या पंचेचाळिशीत तिला जाणवते की इतरांसाठी जगताना स्वतःच्या इच्छा, भावना आणि स्वातंत्र्य यांना तिने पुरेसा वाव दिलाच नाही.
या जाणिवेतून अखिला एकटीने कन्याकुमारीला जाण्याचा निर्णय घेते. रेल्वेच्या लेडीज कूपेमध्ये तिला जानकी, मार्गारेट शांती, प्रभादेवी, शीला आणि मारीकोलान्थू या पाच स्त्रिया भेटतात. प्रत्येक स्त्रीचे आयुष्य, कौटुंबिक परिस्थिती, नातेसंबंध आणि संघर्ष वेगवेगळे असतात. प्रवासादरम्यान त्यांच्यात संवाद सुरू होतो आणि त्या आपापल्या आयुष्यातील सुख-दुःख, जखमा आणि गुपिते एकमेकींसमोर मांडतात.