रफिनू

कंसाई गावात कोरोनाचे संकट पसरते आणि गावकऱ्यांच्या मदतीसाठी फिरके गुरुजींचा हुशार, बुद्धिमान आणि जिज्ञासू मुलगा राजू पुढे सरसावतो. स्वतः विकसित केलेल्या ड्रोनच्या साहाय्याने तो आजारी लोकांसाठी औषधे मागवतो आणि गावकऱ्यांना मदत करण्याचे अनेक प्रयत्न करतो. शेजारच्या गावातील लोक एका वनस्पतीच्या रसामुळे कोरोनामुक्त झाल्याचे समजल्यावर राजू त्या वनस्पतीचा शोध घेण्यासाठी एका आदिवासी व्यक्तीची मदत घेतो. वनस्पतीवर प्रयोग करून कंसाई गावातील रुग्णांना बरे करण्यात तो यशस्वी होतो. पुढे आपल्या वैज्ञानिक मामा डॉ. किरण यांच्या मदतीने त्या वनस्पतीमागील विलक्षण रहस्य उलगडते आणि ज्यांना आदिवासी समजले होते, ते प्रत्यक्षात परग्रहवासी असल्याचे समोर येते. त्या वनस्पतीतील रेणूला ‘रफिनू’ हे नाव दिले जाते आणि राजूच्या कार्याचा गौरव पंतप्रधानांकडून केला जातो. विज्ञान, साहस, कल्पनारम्यता आणि मानवतेची सांगड घालणारी ही उत्कंठावर्धक कथा वाचकांना एका अनोख्या विश्वात घेऊन जाते.