ते आणि मी

शकुंतला पुंडे यांचे ‘ते’ आणि मी’ हे भावनिक नात्याचा अनोखा आविष्कार घडवणारे ललित पुस्तक आहे. लेखिकेच्या नकळत ‘ते’शी जुळत गेलेले नाते कालांतराने इतके उत्कट, मधुर आणि जिव्हाळ्याचे बनते की ते तिच्या जगण्याचाच अविभाज्य धागा होऊन जाते. कोकणातील मुक्त, घनदाट आणि विस्तीर्ण निसर्ग असो किंवा शहरातील घराच्या गॅलरीतून दिसणारा हिरवा रंगमंच, या साऱ्या परिसराशी जोडलेले भावबंध तिच्या अनुभवविश्वाला समृद्ध करतात. लेखिका आणि ‘ते’ यांचे जगणे एकमेकांत गुंफले जाऊन घट्ट वीण असलेल्या रेशमी वस्त्रासारखे एकरूप होत जाते. बालपणापासून आजपर्यंत अलगद जुळत गेलेल्या या नात्याचे चित्रण लेखिकेने सरळसाध्या, तरीही मनाला भिडणाऱ्या शैलीत केले आहे. या सहजसुंदर निवेदनातून तिचे आनंदविश्व वाचकासमोर उलगडते आणि वाचकही नकळत त्या अनुभवाचा वाटेकरी बनतो. निसर्गाशी असलेल्या जिव्हाळ्याच्या नात्याची अनुभूती देणारे, मन प्रसन्न करणारे आणि वाचनातून निखळ आनंद मिळवून देणारे हे पुस्तक आहे.